政情：創新賣陳皮 歐國倫家族做大市場
大家都知陳皮有藥用價值，仲可以用來煲湯，有助潤肺、消滯化氣。不過，近十幾年內地就興起陳皮月餅、陳皮普洱茶等食品，大受陳皮迷追捧。唔講唔知，當年咁有創意將陳皮發揚光大嘅，就係仁愛堂總理歐國倫（Alan）家族，佢哋仲取得內地專利添！
本身係新會人嘅Alan笑笑口話，廿幾年前其家族喺江門開咗一間酒店，當時佢叔父就開始研究將家鄉知名嘅陳皮搞創意，結果陸續發明咗陳皮月餅、陳皮餅及陳皮茶等，市場反應好好。於是陳皮食品大為流行，好多人跟住做，陳皮身價亦隨即水漲船高，當時新造陳皮只係幾蚊一斤，依家已經要百幾蚊一斤。
自創打印機生意上市
Alan話，由於想確保陳皮品質，所以家族後來自己種埋新會柑添！聽佢講陳皮講得咁過癮，以為佢喺家族幫手做陳皮生意，原來唔係，Alan自創一盤打印機生意，仲喺香港上市，所以佢係科技界才俊先至啱。