政情：唔搽防曬 黃冰芬靠飲檸水美白
好多女士都追求美白，每個人都有自己一套獨門秘方。早前喺一個活動見到白白淨淨嘅沙田區議員黃冰芬（Iris），佢話平日唔會搽防曬，保持白淨嘅秘訣就係飲檸水。佢教路要睇準時機飲，亂咁飲唔一定會變白喎！
Iris話，飲檸水會令人易黑又易白，一旦飲完之後成日走出嚟曬太陽，就反而會變黑，所以當佢知道自己有一段時間唔會曬得多太陽，就可以安心多飲檸水喇。Iris仲話，自己讀中學時就已經開始飲檸水，本來只係覺得味道幾清新，後來知道有美白功效，就好開心咁繼續飲。
依家佢午餐、晚餐都會飲，每日飲兩三杯。有時喺餐廳叫咗杯檸水，飲完之後就會將啲檸檬倒落水樽，加水循環再用，咁就可以不斷有檸水飲喇！聽落真係又環保又知慳識儉喎！