政情：高鐵之亂？ 泛民編劇上身 建制玩埋一份

為趕三讀「死線」，委員會尋日周末都召開四小時會議，而周一八小時會議就係最後一次會。雖然時日無多，但班議員就睬你都傻，繼續玩嘢，喺會上大問「情境題」，搞到高鐵車廂好似亂成一團。

車廂內結婚得唔得？

議員陳志全問，如果有人喺草案生效前，於內地口岸區殺人同藏屍，但喺草案生效後先被發現，咁香港警方有冇權力調查？議員譚文豪就問，如果有人想喺車廂或西九龍站內地口岸區結婚得唔得？未婚嘅陳淑莊都突然「搭嗲」，話最極端嘅例子就係佢喺車廂度結婚喎。見大家講得興致勃勃，會計界議員梁繼昌都加把嘴，話自己係香港合法嘅婚姻監禮人，如果有兩名香港人想喺高鐵車廂舉行婚禮，佢係咪有權為佢哋監誓？兩人簽署香港結婚證書又係咪有效呢？法律政策專員黃惠沖惟有不厭其煩咁話，如車廂係喺內地司法管轄區就要睇番內地係咪承認，仲叫佢哋徵詢番內地專業法律意見。

遇性騷擾向誰報警？

咪以為問題多多係民主派專利，阿Ann都玩埋一份，問若喺高鐵車廂中發生性騷擾事件，應該喺內地定香港報警？黃惠沖就答，不論高鐵正在北行定南行，都已非香港境內，故此將會按內地法律處理。

一班議員問唔停，委員會主席葉劉淑儀就講明要喺周一完成審議，政府當日需回應議員提出多達四十二項嘅修正案並交付表決。佢希望本月廿五日可將草案提交內務委員會，然後提交大會恢復二讀。不過就算一切順利，預計最快都要本月底至下月初先可以喺大會二讀，有民主派議員已揚言會再提修正案，但係六、七月只有六次大會，故此係咪可以趕及七月中大會休會前完成三讀，仍有危機。