中環出更：偲嫣結婚「改過」 屋企唔講政治
正義聯盟主席李偲嫣同香港專業進修學校國際教育部副總監謝鋮浚尋日終於拉埋天窗，婚禮上，新郎拎住結他自彈自唱一首《唯獨你是不可取替》，迎接新娘進場，兩人更在泡泡紛飛下相擁長吻達十秒之久，甚是浪漫。偲嫣嘅老爺就大讚「偲偲」呢位新抱有八十五分，仲話偲嫣已經改過，喺屋企唔會講政治。唔通偲嫣結婚之後會淡出政壇？
偲嫣老爺話，「偲偲」又精叻又靚，個人好爽朗，唔會陰陰濕濕，好照顧佢兩位老人家。睇電視見佢好似好「倀雞」，原來好有禮貌。又話兩老對政治冇興趣，偲嫣識咗個仔之後亦都好少去遊行，依家喺屋企都唔講政治喇！
畀人鬧當儲分換禮物
偲嫣都話好多謝老爺、奶奶，仲將兩老嘅結婚相輯錄喺婚宴場刊當中。佢話曾經祈禱希望搵到一個對佢好、孝順兼且受良好教育嘅另一半，結果鋮浚係百分百達到要求，加上咁高大，形容自己好似中咗jackpot（頭獎）咁。佢又話，自己係另類公眾人物，身邊嘅人會受到好大壓力，佢只想談一場永不分手嘅戀愛。過往啲人鬧佢，佢就同上帝講當儲分，希望有日可以換番份禮物，依家終於拎到咁話。
卓妮