香港話就話係法治之區，實際上法律面前人人不平等，家陣仲淪落到要受害者親自向律政司發信討公道，過程曲折過秋菊打官司，你話呢個係乜嘢世界吖？仲有冇公平正義吖？
呢嗱，漢奸黎喺舊年嘅六四集會上指住東方記者爆粗恐嚇，「×你老母×」、「我實會搵人搞×你」、「我影×咗你嘅相」，呢單醜事早就傳千里。慘遭漢奸黎恐嚇嘅東方記者，近一年來成日覺得被人跟蹤，感到生命受威脅，壓力大到食唔安坐唔落瞓唔着，搞到要睇精神科醫生。你知啦，創傷後遺症可大可小，尤其加害者係「傳媒大亨」、「民主鬥士」，財雄勢大，走狗眾多，「搵人搞×」小記者真係易如反掌嘅咋。
本來呢，只要當局依法辦事，壞人始終會被繩之以法，點知律政司唔係伸張正義，依法而為，居然玩龜縮包庇。大家有眼見，一宗有圖有片鐵證如山嘅刑事恐嚇案，又唔係乜嘢複雜畸士，律政司居然拖拉十一個月都唔將漢奸黎落鑊，擺明助紂為虐喇。東方已先後五度去信律政司質詢，可惜對方唔係講虛話、放煙幕，答完等於冇答，就係粒聲唔出，「活死人」咁完全冇反應，叫受害者情何以堪吖。
喂，香港冇王法嘅咩？查實根據律政司制訂嘅《罪行受害者約章》，受害者有權取得調查及檢控資料，知悉案件進展，即係話律政司起唔起訴漢奸黎都好，都必須向受害者交代。律政司至今冇聲冇氣，點止自毀誠信、自打嘴巴吖，直情知法犯法，罪加一等喇。忍無可忍，拒絕再忍，東方記者尋日親自去信律政司要求交代。避得過初一，避唔過十五，家陣受害者被迫企出來發聲，點容許律政司繼續玩潛水扮鴕鳥吖！
講到呢度，相信好多人同功夫茶一樣有疑問，漢奸黎一再獲司法放生，到底有乜嘢內情先？淨係臭名昭著嘅政治黑金案，律政司不作檢控已經夠晒經典，都唔使講壹淫媒其他宣淫販賤屢屢被輕判嘅例子。正如監察團體話齋，律政司唔敢告又唔敢掂，除咗驚咗外部勢力，仲擺明有政治考慮。咁又係呀，律政司司長鄭若驊一上任就被踢爆僭建，爛果報同反對派明明死咬唔放，點知政治黑金案一獲放生啫，佢哋即刻偃旗息鼓，有冇咁啱得咁蹺呀？仲有喎，林鄭不惜得罪中央都要玩「大和解」，話唔係被人捉住痛腳，搵鬼信咯。
一句到尾，公道自在人心。秋菊鍥而不捨打官司，無非要討個說法，東方今次第六度去信律政司，都係旨在維護第四權同討回公道咋，律政司繼續庇奸護淫，因住天打雷劈吖！