政情：區諾軒攞A都燒基本法 通識確需要改革

區諾軒讀書年代仍然係考中學會考同高級程度會考，佢話當年因為會考成績差，升中六時被校方慫恿，揀咗當時新開設嘅通識科（高級補充程度）嚟讀。不過，自認係「白老鼠」嘅區諾軒似乎好享受，佢喺立法會大會上發言話通識科令佢了解中國國情，例如知道五星旗上各粒星嘅代表意義，仲即時讀出四粒細星分別代表工人、農民、小資產階級同民族資產階級。

點名寸蔣麗芸解錯五星旗上四粒星

之後區諾軒仲點名寸建制派議員蔣麗芸（Ann），話學生如果有讀通識科了解五星旗，「咁就唔會出現蔣麗芸議員講嘅『士農工商』囉」。原來阿Ann喺一二年出席活動時，曾透露會考考過五星旗內容，結果將旗上嘅四粒細星講咗做「工農兵商」而甩轆，勢估唔到事隔多年後再被區諾軒抽水。抽完水之餘，區諾軒又認叻話當年通識科分為幾部分，而佢喺中國部分攞A，成績仲好過攞B嘅香港部分添，不過由於佢喺專題研究部分得C，所以最終拉勻只得B。

不過，攞A抑或攞B都好，喺通識科高分其實唔代表啲乜，區諾軒就係最佳例子。喺一六民陣集會，區諾軒喺大庭廣眾下焚燒《基本法》，所以佢早前喺港島區補選勝出，而喺立法會宣誓就任時，身兼新民黨主席嘅葉劉淑儀同副主席容海恩，就喺會上高喊「燒《基本法》，可恥」，跟住離場抗議添！質疑區諾軒焚燒過《基本法》，但宣誓時話擁護《基本法》根本係講大話，亦有市民質疑佢未有真誠尊重同捍衞《基本法》，要求推翻佢嘅選舉資格。

雖然區諾軒強調當日燒嘅係《基本法》嘅影印本，但係喺通識科攞A嘅人走去燒《基本法》，反映通識科嘅教學內容仍然有不足，係咪冇教到學生要擁護《基本法》呢？咁就真係需要改革嘞！