中環出更：禁問高球場 梁君彥被批「父親上身」
近期有關收回粉嶺高爾夫球場土地備受爭議，但議員尹兆堅尋日喺立法會上提到有關事宜，一度被立法會主席梁君彥禁止佢嘅發問，事後尹兆堅指梁君彥嘅兒子梁宏正係香港哥爾夫球會常務理事，質疑梁君彥「父親角色上身」，為維護兒子而禁止議員提問收回高球場。
指尹兆堅離題
話說尹兆堅喺會上發言提到土地供應問題，當佢追問政府係咪有勇氣收回高球場時，梁君彥指尹兆堅離題，要求佢坐低停止發言，尹兆堅立即否認並再作提問，而梁君彥就重申已禁止佢發言，雙方爭吵幾句，其後尹兆堅指當局都有意回答相關問題，梁君彥先退一步繼續畀佢發問。
尹兆堅喺發言後大呻「高球場」成為梁君彥嘅心魔，指凡有議員提高球場三字，梁君彥嘅反應都好大，質疑梁君彥係想維護兒子梁宏正。尹兆堅叫梁君彥記得「自己係主席，唔好父親角色上身」，要求佢裁決要公正。
卓妮