中環出更：吳鄭慧賢三年抱五 做善事為仔女積福
仁愛堂早前舉行就職晚宴，今屆董事局嘅新人多達廿幾個，福建社團聯會主席吳良好嘅新抱吳鄭慧賢（慧慧）、仁愛堂新任主席羅台秦（Louisa）嘅細女戴凱倫都係新丁總理。卓妮見慧慧腹大便便，預計下個月中旬就生，仲要係孖女添！點解佗緊BB咁辛苦都要加入善團？佢笑稱因為想做多啲善事，幫五名子女積福喎。
咁後生就有五名仔女？慧慧笑笑口話其實連埋呢一胎，佢同老公吳志龍都只係生咗三胎，第一胎係個仔，第二胎係孖仔，依家第三胎都係孖嘅，結果就「三年抱五」喇！佢話原本想生三胎，結果上天畀咗五個，都覺得好開心，仲想快啲生完就出番嚟做嘢添！呢頭講完要做善事為仔女積福，嗰頭慧慧同吳志龍就喺拍賣環節成功競投被譽為普陀山「鎮山之寶」嘅道生長老墨寶《阿彌陀佛》，加倍開心。
當晚除咗有例牌嘅慈善義唱之外，最引人注目嘅係有五幅字畫拍賣，其中三幅係兩岸嘅宗教界大師墨寶，除咗道生長老之外，仲有台灣佛光山星雲大師嘅《仁心仁德 天下一家》，同埋中國道教協會會長任法融嘅等《天行健》墨寶，一輪熱烈競投成為晚宴嘅高潮。
謝玲玲捐親筆油畫拍賣
Louisa話五幅拍賣精品係善長們無條件送出，佢嘅名媛好友謝玲玲亦捐出親筆油畫《杜鵑白樺》。謝玲玲就笑笑口話佢同Louisa都係台灣人，梗要互相支持。結果當晚共籌到過千萬元善款，難怪Louisa猛話覺得好感恩喇！
卓妮