香港政府無嘢多，就係政策思維膠到爆嘅高官特別多，之但係高官好哋哋，點解相繼變晒做膠官呢？呢個問題一直令人百思不解，不過依家終於有答案喇，原來係因為呢班高官平時大魚大肉，結果食食埋埋啲膠魚落肚，最終咪搞到啲思維膠到不能自拔囉。
呢，尋日就有環保組織公布研究報告，指香港海洋嘅微膠粒含量達到每平方米約五百件，唔止高過國際平均值，數量仲係美國嘅兩倍幾，連美國呢個超級大國都唔夠香港咁膠，你話香港幾威呢。研究仲發現有六成嘅野生烏頭魚體內含有塑膠，平均每條有超過四件塑膠碎片，其中一條更加多達八十件，不過最得人驚嘅係，喺街市買返嚟嘅十三條烏頭、一條海魚同三十條魚腸入面，同樣發現塑膠碎片，呢啲魚全部喺本地海域捕捉，睇嚟以後除咗可以話人「汝家池塘多鮫魚」，仲可以高呼「香港水域多膠魚」喇。
咪以為食烏頭魚搭膠，頂多咪好似買鯇魚尾搭嘴咁，破壞力有限，實情呢啲微塑膠可能含有有害添加劑，人類進食咗呢啲膠魚，等於將毒素照單全收，影響神經系統同內臟功能，都咪話唔大鑊呀。講到尾，之所以咁多膠魚都係因為政府環保政策做得太差，啲高官食咁多膠魚落肚，害番自己好啦，家陣連累埋小市民都要食魚變食膠，全港市民個個身受其害，真係多得呢個膠政府同班膠官唔少。
即係咁，香港嘅環保政策向來都係天殘地缺，顧到頭顧唔到腳，好似近年香港家居嘅塑膠棄置物咁，無錯係不斷減少呀，不過工商業嗰邊過去十年就增加咗七成嗰度弊呢，冇計啦，政府推動環保永遠得把口喺度噏，做起上嚟就龜爬都快過佢。唔使講咩，減塑政策講嚟講去都仲係研究階段，訂立淘汰即棄塑膠嘅時間表，更加係遙遙無期，旨意呢個無能政府搞環保喎，真係蚊都瞓、蛇都死呀。
唔好唔記得幾年前強颱風襲港，吹冧咗六個載住塑膠原料「聚丙烯」嘅貨櫃，搞到一百五十噸膠粒流入香港水域，漂埋去魚排，當時政府蠱惑呀，遲遲唔公布，臭屎密冚，最終係市民一呼百應自發落海灘執膠粒咋。呢個政府咁廢，見到成海膠粒就唔識處理，見到啲印有簡體字嘅海洋垃圾又闊佬懶理，香港都變臭港啦，上個月就有德國環保船睇唔過眼，遠道而來去咗西貢幫手清理海底垃圾，呢個政府仲有冇醜啲呀。
不過特衰政府有名你叫，搞乜都只能一事無成，莫講話環保，就連房屋、醫療、教育、安老，總之你講得出嘅，通通冇一瓣搞得掂，因為膠官膠魚食得多，有諸內形諸外，無時無刻派膠，呢啲就叫「膠度自治」嘞。