中環出更：陳肇始甩底 黃大仙區會鬧冇口齒
黃大仙區議會原定尋日同食物及衞生局局長陳肇始會面，表達不滿聖母醫院重建後仍未能提供急症室等服務多項訴求，但陳肇始喺會面開始前約半個鐘臨時「甩底」，由副局長徐德義頂上。黃大仙區議員同多個團體共數十名代表，批評陳肇始「冇口齒」及唔尊重區議會，佢哋又向徐德義遞交請願信，而全體區議員更喺會面時集體離場抗議。
區議員簡志豪話約一星期前獲告知陳肇始將會出席會議，但開會前先知佢因公務未能出席，覺得唔能夠接受，因為局長應該把握機會聽地區意見，區議會喺今年一月曾得到各黨派一致通過動議，要求聖母醫院重建並增加更多嘅病床以及提供急症室或二十四小時急診服務等，現時方案同區議會嘅要求相距甚遠，當局更打算同其他數間醫院綑綁一齊提交上立法會審議，佢哋擔心隨時影響黃大仙居民嘅利益。
徐德義代為會面
徐德義就回應話陳肇始因特別嘅事而未能出席會議，食衞局係一個團隊，所以由佢代表局方同區議會會面。佢又話當局聽到區內聲音，聖母醫院擴建工程與其他醫院工程綑綁提交上工務小組，係希望增快效率，而聖母醫院日後將會額外提供多四十張住院病床同十六張日間病床，空間同設施方面都會有改善，加上啟德急症醫院將會提供急症服務，相信能夠應付附近居民需要，但佢並冇承諾方案能夠作出調整。
卓妮