公院人手荒愈演愈烈早就唔係新聞咯，之但係惡化到連護理支援人員都出現逃亡潮，就唔到市民唔心慌。大吉利是講句，大家都有機會病，都有機會入醫院，到時醫生又冇，護士又缺，連支援人員都唔見影，唔閉翳就假。
嗱，尋日嘅立法會財委會特別會議就討論到護理支援人員流失率持續高企嘅問題，醫管局總裁梁栢賢承認公院請人困難，好似一六至一七年度七個聯網共取錄二千四百多人，但同一時間就流失二千一百多人，都咪話唔誇張。以港島西為例，該年度請咗二百一十二人，但辭職唔撈嘅多達二百四十三人，出現負增長。佢老哥就賴基層多數住喺新界，唔願意跨區返工，交通不便所以難請人喎，呢啲咪叫賴地硬囉。
呢，有立法會議員就講得啱嘞，護理支援人員流失率高企，交通不便都係其次，主要原因係待遇偏低，新舊制員工仲要津貼不一，加劇不公平。咁又係呀，醫院呢座白色巨塔不嬲階級觀念極重，醫生固然高人一等，家陣連護理支援人員都同工不同酬，新制員工淪為最低端人口，點會唔谷氣吖。工會曾多次約見港府反映訴求，偏偏港府好似借咗聾耳陳隻耳咁不聞不問，護理支援人員做到心淡，唔走至奇。
最好嘢係，即使面對各界炮轟，梁柏賢依然話之你，講明唔考慮將新舊制員工津貼劃一，只話未來會增加員工晉升機會，挽留人手喎，擺明敷衍啫。講真，醫管局「肥上瘦下」都唔係今日嘅事嘞，咪睇港府對醫管局嘅撥款年年增加，淨係今個年度已達六百多億元新高，之但係公院人手不足依然持續，十個煲依然得七個蓋，病人睇病依然等到死，啲錢到底使晒去邊，大家心照喇。
冇錯嘞，不論前線人員幾大怨氣都好，亦不論公院醫療事故幾大鑊都好，醫管局高層一樣年年大幅加薪，唔到你唔服。睇吓醫管局盤數就知，每年最大筆支出係員工成本，好似梁柏賢佢老哥吖，一六至一七年度獲支薪近六百萬元，比上個年度多咗近廿五萬元，人工高過特首，夠誇張未？其他高層一樣荷包腫脹，年薪過五百萬元閒閒哋，最正係有責不問，咁筍嘅工去邊度搵吖。難為基層及前線醫護人員做到有氣冇碇抖，連劃一津貼咁卑微嘅訴求都冇人理睬，冇鞋挽屐走就係咁解。
咁點解港府對人手荒問題闊佬懶理？好簡單，公院服務不斷惡化，即係逼患者轉投私家醫院，長期冇人吼嘅自願醫保咪有人幫襯囉。港府為咗推卸公共醫療責任，有乜嘢做唔出吖！