政情：工聯會新領導層 麥美娟最年輕
工聯會新一屆領導層同傳媒茶敍，工聯會理事長黃國話有八人因年齡關係退出領導層，所以今屆有八名新人加入，現時領導層平均年齡係五十三歲，新班子變得年輕化，而領導層中，年紀最細嘅就係現年四十六歲、身兼副理事長嘅立法會議員麥美娟（Alice）嘞！
笑言盡力扮再後生啲
Alice笑稱會盡力扮到再後生啲，等大家相信佢真係最後生，其實佢同會長吳秋北係同年出世，一個年頭，一個年尾，只係相差少少。吳秋北就被問起怕唔怕唔知女兒突然拍拖，佢秒答「唔會！」雙方溝通都仲可以，大女已讀緊中四，讀書壓力大，見家長時，被老師提佢「我知你哋父母好忙o架，你梗係唔係好理佢啦，你哋都要留意小朋友嘅功課o架」，但女兒其實讀書都OK。
黃國就講起自己個名同工聯會立法會議員黃國健好似，有時仲會收錯信，例如啲信原本寫啱黃國，但寄信人又以為自己寫錯，手寫加個健字落去，相信係因為自己以往處理幕後事務較多。
工聯會今年七十周年，將會有唔少慶祝活動，包括第一屆粵港澳大灣區技能大賽，會分為焊接大賽、飲食同髮型化妝，又話焊接大賽同日常燒焊唔同，水底都可以燒焊，係國際性技能大賽。