政情：老將謀區選空降泛民恐自掘墳墓
民主派姚松炎爆冷喺上月立法會九龍西補選落敗，泛民密謀翻身，明年區議會選舉將會係試金石。據政界流傳泛民區選協調名單，以民主黨（白鴿黨）最重錘出擊，立法會議員尹兆堅將空降荃灣楊屋道選區，硬撼自○三年喺該區當選嘅民建聯陳恒鑌，而兩名白鴿黨前副主席單仲偕同蔡耀昌喺離島「復出」，其中單仲偕有意取回已退黨嘅郭平喺逸東邨南嘅根據地，至於蔡耀昌則有意喺東涌南選區挑戰民建聯「雙料議員」周浩鼎，阻止對方再循俗稱「超級區議會」嘅區議會（第二）功能界別議席進身立法會。不過，正所謂「氹仔浸蛟龍」，有知名度嘅泛民空降區選，唔單止冇保證，隨時輸到一仆一碌。
距離區議會換屆選舉只有一年半時間，建制同泛民均加緊各自協調工夫，首先流傳嘅係泛民區選協調名單，白鴿黨現時五名「雙料議員」，包括胡志偉、涂謹申、鄺俊宇、林卓廷同許智峯料會喺原區角逐連任。
尹兆堅轉區 硬撼陳恒鑌
最令人意想唔到嘅係三年前喺葵青石蔭選區，以五十多票之差落敗嘅尹兆堅，有意轉區空降荃灣楊屋道選區硬撼同為立法會議員嘅陳恒鑌，換言之，尹陳二人只有勝出一方先會係「雙料議員」。尹陳二人早年因選民登記投訴機制，同場或隔空都多次唇槍舌劍，今次真係新仇舊恨一次清。
單仲偕或復出 落戶離島
協調名單另一個特色，就係泛民多名老將「復出」或捲土重來參選，最引人注目係「老鴿」、立法會前議員單仲偕，佢喺前年立法會換屆選舉於港島區排第二，力撐排第一嘅許智峯當選後，其後佢未有新動向，有傳佢落戶離島逸東邨南，取回長年由白鴿黨勝出嘅老巢。而公民黨嘅立法會前議員陳家洛據報喺泛民協調後獲優先權，有望第二度參選南區海怡東選區。
至於九西補選意外輸咗畀建制派鄭泳舜嘅建築、測量、都市規劃及園境界前議員姚松炎，政界早前有傳姚或落戶深水埗南昌北，喺區選再同鄭一決高下，但據稱姚松炎未表態去向，經協調後暫時優先喺三年前落敗嘅南區置富選區捲土重來，最終其實係咪聲東擊西，相信泛民同道人都好想知道答案。
講到底，市民對於區議會選舉參選人嘅要求「貼地」好多，若然有人妄想以知名度或政治效應空降上陣，就可以取代傳統地區「揼石仔」工作，此舉唔單止昧於形勢，形同自掘墳墓，睇怕最終只會賠了夫人又折兵。