政情：撐器官捐贈 柯仔公開講「我願意」
公開承諾唔係每個人都做得到o架，立法會議員柯創盛（柯仔）都話自己好少公開講「我願意」，對上一次已經係結婚時，不過，另一樣嘢佢就肯公開講「我願意」喎，就係捐贈器官嘞！睇嚟呢樣嘢對佢嚟講，同結婚一樣咁重要喎。
柯仔尋日出席一個支持器官捐贈嘅活動，食物及衞生局局長陳肇始、立法會議員葛珮帆同鄭泳舜等人都有出席。柯仔話好多年前已經簽咗器官捐贈卡，依家仲有袋喺身邊，見到張卡又黃又舊，仲有唔少污漬，證明佢冇講大話啦！
說服媽媽支持唔容易
柯仔回憶起當年說服媽媽支持佢簽捐贈卡都唔容易，佢話媽媽為人比較傳統，都會覺得人死後要留全屍，所以都要睇啱機會先能夠說服到媽媽支持佢，佢估計單獨傾未必掂，於是揀咗一個全家人一齊食飯嘅日子，兄弟姊妹一齊幫口說服媽媽，自己就同媽媽講，捐器官可以幫到人，結果媽媽就喺半推半就之下答應咗嘞！