中環出更：青年宿舍住戶有BB 鄺俊宇憂被迫遷
保良局元朗馬田壆青年宿舍，對象係十八至三十歲、符合相關入息水平上限嘅香港永久性居民，仲接受一人申請或二人申請添，即係話想享受獨居或者二人世界都可以申請入住。不過，孤男寡女共處一室，可能會出事。立法會議員鄺俊宇（Roy）尋日就喺立法會一個會議上提問，如果兩人單位住戶有咗BB點算，仲話相信呢個情況係「正常不過」。
阿Roy呢個問題可能都考起與會嘅民政事務局副局長陳積志，陳積志回應完如果懷孕應該會有安排後，就交咗個波畀保良局行政總監陳欽勉。陳欽勉就話二人單位嘅設計確實係唔太適合小家庭嘅，但佢哋會有百之五嘅單位係畀有特殊需要人士。
希望人性化處理
阿Roy聽完就問，如果出生率高於百分之五咁點算，又話相信有咗BB都係開心事，希望有關方面可以人性化處理，唔好迫遷咁話。
另一議員陸頌雄就話青年宿舍以不高於市價六成出租，相信好多年輕人都有興趣，包括家有千呎嘅小康之家青年，或者係屬於「擠迫戶」嘅年輕人都可能會申請，希望當局能作出篩選；而議員張超雄就希望原本居於兒童院舍，但需要遷走，或牽涉家暴問題、有特殊需要等人士可優先入住。
卓妮