中環出更：唔做怪獸家長陳昆想囡囡捱吓
現今社會講求競爭，唔少父母都相信贏在起跑線嘅一套，早早為子女作好規劃，希望佢哋有美好將來。不過，咁嘅態度就唔代表父母過分保護，好似香港菁英會副秘書長陳昆就直言，小朋友經歷過困難仲好，講到尾都要夠努力先得喎。
菁英會會員事務委員會早前同澳門菁英會、香港中山青年協會同澳門中山青年協會合辦名為「人生非偶然」嘅分享會，大談人生際遇，吸引到唔少菁英會中人前往取經，包括主席莊家彬、榮譽主席楊華勇同盧金榮、執委王詩雅等人，而品牌發展局主席黃家和都係座上客。
盧金榮想帶小朋友衝出亞洲
陳昆透露囡囡即將出生，而太太更開始留意定幼稚園資料添，真係一早就為囡囡嘅將來打算喎！但唔好以為佢係怪獸家長，皆因佢覺得畀啲考驗囡囡反而更有利成長，而佢亦都相信即使起跑線上有所輸蝕，都可以經後天努力去彌補咁話。另一位爸爸楊華勇就會帶小朋友去探訪老人、賣旗籌款等，畀機會佢哋親身體驗，至於父母計劃周詳與否，都需要小朋友自己努力先有用喇！
兩女之父嘅盧金榮都有做規劃，但講緊嘅係旅行大計！佢話以前囡囡年紀太細，只能夠去距離較近嘅地方旅行，仲要挑選啲啱小朋友玩嘅地方，好似水族館等，但隨住佢哋已經分別有九歲同十一歲，佢就笑住話好快可以衝出亞洲嘞！
黃家和就覺得人生追求目標嘅過程會有好多分岔路需要作出抉擇，所以並唔係有規劃就無迷惘咁話。不過，講起自己成長，佢就話父母係採取放任政策，事關屋企有十四個兄弟姊妹咁多，可以點管喎。
卓妮