政情：泛民認定小麗又被DQ 補選Plan B爭餐懵

劉：撤上訴未有定論

下一輪補選或只處理小麗喺九龍西嘅席位，而上月中舉行由DQ風波引起嘅首輪補選，香港眾志常委周庭因黨章寫明「民主自決」被DQ參選港島區補選嘅資格，因此政圈界均相信小麗再次參選亦同樣會被DQ。但有泛民中人估計，小麗背負「DQ光環」，兼要準備派員出戰一九年區議會選舉，下輪補選係必須出戰，並因而可對其Plan B人選有欽點權。但上次初選出現「屈基（馮檢基）」事件，民主派要另覓人選非易事，小麗亦難搵一個啱心水兼能服眾嘅人代戰。

自首輪補選落幕，一直有聲音要求長毛同小麗撤銷上訴，爭取盡快啟動第二次補選。但小麗就話，其實乜嘢都未開始諗，仍要等長毛回覆要唔要一齊撤銷上訴。至於最新傳出民協楊彧係小麗嘅Plan B，小麗笑咗一聲：「我都未見過佢」，認為目前講Plan B係言之過早。佢又認為姚松炎喺上輪補選落敗，對民主派已響起警號，指出大家整合程度不足，大家唔知對方做緊乜？

但民主派已蓄勢待發備戰補選，相信「屈基」後馮檢基暫不會再參選，其徒弟民協何啟明則蠢蠢欲動；公民黨區議員余德寶近日頻現身，可能都想爭曝光備戰換屆；舊年退出工黨嘅胡穗珊加入「社區前進」同小麗雖然睇嚟行得好埋，但只稱係隨時準備參選；民主黨「乳鴿」袁海文喺初選一戰後名氣略增，惜黨內仍有暗湧，係咪再戰亦有待商榷。

有政界人士話上述人選各有支持者，但係冇一個人「星味」夠濃，可擔起「民主派代表」出戰同建制派「隻揪」，似乎下一輪補選前，民主派勢必又混戰連場，睇吓邊個可以笑到最後，正式參選。