中環出更：梁美芬自爆喺果欄長大
最近有一套電視劇熱爆，係講關於果欄嘅故事，更加令油麻地果欄變成景點，經常人頭湧湧。唔講唔知，原來本身係法律學者嘅立法會議員梁美芬都係喺果欄長大嘅。
其實梁美芬細個住喺荃灣嘅公屋就好多人都知道，究竟佢同果欄有乜淵源呢？近日佢就喺社交網站上載幾張喺果欄影嘅相，佢話細個入住公屋之前，係喺油麻地果欄長大嘅，直至兩、三歲先至搬走，依家果欄一個九十幾歲嘅老檔主仲係佢爺爺嘅老街坊添！
搬走後仍返去幫襯
佢話爺爺以前喺果欄附近開鐵業嘅舖頭，果欄有好多嘢係用鐵造，所以啲檔主都同佢爺爺相當熟，而自己搬走之後，仍不時探爺爺，所以都經常返去果欄，自己做咗議員之後，仍然有返去幫襯，近日就買咗好多士多啤梨同杧果，都係果欄檔主推介。
至於套電視劇，佢話都有追，想睇吓拍成點。佢又話唔敢講套劇反映全部事實，但都反映到一啲回憶喎。
卓妮