中環出更：龐愛蘭學禪修放低煩惱
好多人都有迷失嘅時候，點樣先令到自己醒覺呢？婦女事務委員會委員兼沙田區區議員龐愛蘭（Scarlett）就話，幾年前因為選舉之前，不斷諗選定唔選而覺得好迷失，最後經朋友介紹去咗學禪修，令心境平靜同改變。
紫荊青年商會尋日舉行「同心圓系列：真我‧蛻變」開幕禮暨分享會，請嚟唔同嘅邊緣女性社群代表分享「蛻變」嘅過程。做主禮嘉賓嘅Scarlett喺會後講及禪修嘅事，佢認為可以透過三大問題去令自己覺醒，包括你做緊咩、唔同事件喺你生命中嘅排序，以及想將來嘅生活係點樣？從而發掘個人興趣同理想。佢又笑稱，以前好執着認為囝囝同未來新抱一定要一齊住，依家覺得無咁嘅需要，認清大家都想有空間生活，所以同囝囝女友以朋友方式去相處，依家關係都幾唔錯。
全女班邀請 馮興禮好緊張
另一位主禮嘉賓、勞工及福利局政治助理馮興禮（Henry）喺致詞就話好緊張，因為係全女班嘅商會嚟邀請佢出席活動，自己比較怕羞，好在有啲男士嚟撐吓場先無咁緊張！佢話四十年前商會成立之初，爸爸、立法會前秘書長馮載祥負責致詞，所以爸爸講明要睇番佢嘅致詞，但爸爸講嘢又幽默過佢，搞到好大壓力喎。佢乘機推銷政策，話一六年香港有十九萬名「家庭主夫」，戲稱過多幾年自己結咗婚都可能會變「家庭主夫」，認為女性嘅權益同喺勞動市場地位有日益提升，未來會推動更多同婦女勞動力有關嘅政策。
紫荊青年商會會長巫嘉儀（Zoe）就話，社會只會為邊緣社群女性提供金錢援助，往往忽視咗佢哋嘅個人潛能同就業夢想，深信只要畀到佢哋鼓勵同機會，就可以自力更生，甚至成為推動社會進步嘅一分子。佢又話商會將舉行一系列活動同十節免費課程，引導參與者以正面態度迎接挑戰，以致最後蛻變成長。
卓妮