香港同澳門兩個特區，回歸後唔係「兄弟爬山，各自努力」，而係「兄弟滑坡，各自折墮」，單係涉貪方面就堪稱難兄難弟，睇見都眼冤！
澳門廉政公署尋日發表一七年工作報告，佢哋舊年共接獲一千二百多宗投訴及舉報，足足比對上一年增加三成八！當中行政申訴佔近六成，涉及公職人員利用職務之便以權謀私、濫用職權、巨額詐騙等瓣瓣齊，正一沒有最離譜，只有更離譜。
所以話梳打埠金玉其外，敗絮其中。咪睇平時官老爺一個二個道貌岸然，實際上好似內地順口溜話事偈︰「不查個個人模狗樣，一查個個男盜女娼」，今次澳門廉記嘅報告就好似將塊地氈揭開，底下嘅蛇蟲鼠蟻、千年塵垢一次過暴露晒出嚟。澳門官場到底有幾渾濁不堪，官僚貪污到底有幾有恃無恐，可想而知。
講到澳門大貪官，不得不提前運輸工務司司長歐文龍。雖然佢老哥受到法律制裁，但澳門審批土地制度漏洞多多，咁多年嚟一啲都冇改善，淨係講疊石塘山建築項目呢單，當中涉及嘅違規亂象三日三夜都數唔完，有人甚至涉嫌霸佔官地胃口愈來愈大，「地盤」由原來幾百平方米「擴充」二百倍至五萬多平方米，你話當中冇腐敗都冇人信喇！
話時話，澳門政府一四年係威係勢設立《城市規劃法》，為各區編製總體規劃，務求批地時有章可循，懶係執正嚟做咁，點知畀立法會議員踢爆原來大歎慢板，直至最近至進行招標，等到規劃真正落實，蚊都瞓蛇都死。鬼咩，千里為官只為財，有水齊齊cap，無謂斷人衣食咁折墮吖，吓話！
呢嗱，呢個正正就係問題癥結所在嘞，澳門官官相護文化根深柢固，有乜嘢大家圍威喂拆掂佢，有乜法子唔出事吖。唔使講得遠，澳門海關接連發生兩次倒掛五星旗鬧劇，更兼無理扣查外國七人醫生團隊，鑊鑊新鮮鑊鑊甘，但幾時見過有人問責o架？仲有吖，颶風「天鴿」舊年襲澳，造成死傷枕藉，前氣象局局長預測失準，賴到應一應，點知一個屈尾十印印腳咬長糧，最尾因為民憤實在太大，當局至係咁意罰佢四年冇得領退休金。
咁當然，講到官場腐敗，香港同澳門只係五十步笑百步，睇吓港府前「冧巴溫」同佢副手先後淪為階下囚，就知咩料。國家之敗，由官邪也，港澳特區「各自折墮」，家陣知點解喇！