政情：憂外訪宴被統戰 范國威樁腳變驚弓鳥
政府由今屆區議會開始，向每名區議員發放一萬蚊嘅外訪津貼，大埔區議會喺嚟緊周六（14日）就出發去杭州、寧波同象山。區議會尋日公布詳細行程，寫明會同寧波統戰部晚宴，數名泛民主派區議員就擔心「被統戰」，急急要求秘書處取消飯局。當以為爭取成功之際，外訪團副團長黃碧嬌就確認飯局無取消，只係旅行社會安排「覺得唔舒服」嘅區議員去另一間餐廳食飯。
新民主同盟立法會議員范國威尋日聯同該黨三名大埔區議員，包括任啟邦、周炫瑋同關永業，加埋獨立區議員任萬全召開記者會。關永業指外訪團十三餐中有五餐都係同官方宴會，第一日晚餐仲係同統戰部食飯，擔心咁會「被統戰」，所以立即同區議會秘書處聯絡要求跟進，較早前就獲得最新行程表，將所有官方宴會改為「午餐」或「晚餐」。
當以為外訪團「跪低」，黃碧嬌回覆查詢時就話尋日開茶會無泛民議員出席，又無人反對去食飯，既然有人「覺得唔舒服」，就請旅行社另外安排團餐畀幾位議員。佢直言，「你可以選擇唔去，唔可以阻止我都唔去」，認為宴會都可以係認識內地嘅一種方法。