港大法律系副教授戴耀廷早前喺台灣發表港獨言論，建制派鬧爆戴耀廷「播獨」，泛民主派聲援戴有言論自由，最新發展係建制、泛民繼續於議會層面大鬥法，鬧雙胞動議休會待續議案，聽日喺立法會內務委員會進行討論。
建制派由民建聯陳克勤作為代表提出休會待續議案，措詞係有關佔中發起人戴耀廷今年三月喺台灣出席論壇發表港獨言論對香港及國家利益影響。至於泛民則由公民黨郭家麒作為代表，佢將矛頭指向港府，稱港府對戴耀廷言論所發出嘅譴責聲明，對香港言論同學術自由嘅影響。
建制同泛民就戴耀廷言論鬧雙胞提出休會待續議案，如獲得內會支持，最快下月九日喺立法會大會上提出，由於建制派喺立法會有過半數人數優勢，料會力撐陳克勤提出休會待續議案嘅措詞。