政情：姚思榮搞公廁革命 吸旅客
其實一個地方嘅公廁乾唔乾淨，好影響旅客對嗰個地方嘅觀感，所以立法會旅遊界議員姚思榮尋日喺立法會行政長官答問大會上，提出香港公廁衞生問題，話現時好多香港旅遊熱點嘅公廁都好污糟，如位於香港中心地區嘅中環街市咁，更遑論偏遠地區嘅公廁喇！所以佢就問特首林鄭月娥會唔會搞番場「公廁革命」，仲話會跟進到底，甚至組織公廁考察團去巡視，仲話要區區都搞有特色嘅icon公廁，推廣吓旅遊業咁話。
搵年輕人設計 區區有特色
林鄭月娥認同公廁環境對旅客觀感有重大影響，所以都強調政府有決心改革公廁問題，例如針對公廁清潔工人嘅安排咁，佢之前就安排咗食物環境衞生署、康樂及文化事務署同轄下嘅合約承辦清潔商見面，會積極商討如何改善情況。佢又話中環街市等緊市區重建局安排重建，雖然有啲爭議所以有延誤，但近日已經圍咗圍板，相信好快可以改善情況。
但姚思榮對林鄭月娥嘅答覆似乎未夠滿意，佢喺答問大會後向傳媒指出，政府早前曾削減外判清潔工人數量，令清潔公廁人手唔夠，先會導致今時今日公廁環境惡劣嘅情況，又提到內地近日都搞緊「公廁革命」，質問點解香港會搞唔成？所以佢強調自己會就「公廁革命」跟進到底，例如考慮組織「公廁考察團」，去睇吓各區嘅公廁有幾污糟有幾臭。
既然要搞「公廁革命」，冇理由淨係搞衞生問題咁執輸嘅，所以姚思榮仲提出要搞icon公廁，話公廁除咗係旅遊業嘅基本設施外，如果整到icon公廁有助推動旅遊業，仲叫政府去搵啲年輕人設計公廁，實行「區區都有icon公廁」咁話喎。