中環出更：唔認開會偷雞煲劇 梁志祥話係「睇跌打」
立法會尋日召開大會，去到議員質詢環節，民建聯議員梁志祥聚精會神望住自己枱面，似乎好專心咁辦公，點知再仔細一看，原來佢只係「扮工」，枱面上橫放住手機，而手機屏幕則播放着疑似古裝劇，令人懷疑佢開會期間煲劇！
指古裝人物係介紹歷史
梁志祥疑似煲劇期間，正值金融服務界張華峰（肥老闆）提出嘅議員質詢。事後梁志祥承認對肥老闆提出嘅金融措施問題唔熟悉，所以就偷空「撳下手機」，但佢就否認係煲劇，話係瀏覽社交平台期間，發現一段介紹跌打嘅短片，感興趣下就睇咗一小段，又指片中身穿類似古裝嘅人物，正正係講緊跌打嘅歷史喎。問佢攞段片嚟睇吓喇，佢就話社交平台嘅推介短片係隨機，已經搵唔番嘞！
其實唔少議員曾經喺開會期間睇片睇相斷正，其中民主黨嘅立法會前議員何俊仁早年曾經被踢爆瀏覽艷照，事後被網民戲稱為「AV仁」；而進出口界議員黃定光亦曾被發現喺議事廳內用手機收看金髮美女教打桌球嘅影片，唔知梁志祥下次「睇跌打」時，會唔會選擇喺會後先睇呢？
卓妮