中環出更：「行大運」式買六合彩 貝鈞奇兩次中二獎
中六合彩係唔少港人嘅心願，香港足球總會副主席貝鈞奇原來中過兩次二獎，加埋有成四百萬港元橫財。運氣爆燈背後，原來佢有「特別的買六合彩技巧」，就係要行到邊買到邊。
日前見到貝鈞奇下晝五點幾喺中環士丹利街投注站買咗幾張六合彩，雖然當日天氣幾熱，兼且陽光猛烈，但係佢一路由中環向上環方向不斷行，身穿成套西裝嘅佢，真係企喺隔壁見到都覺得佢熱，而佢不時將手從後伸入西裝褸內，疑似正在「(抓)痕」，未知係太熱流汗唔舒適，定想趁機揭起件西裝褸去散熱呢？
行咗十五分鐘，貝鈞奇終於去到第二站，就係上環機利文街嘅投注站嘞！只見佢又再拎起幾張六合彩飛，買完之後又再睇多幾眼先心滿意足咁收埋，跟住再行多兩個街口先入咗間茶餐廳坐低抖吓。
卓妮上前問佢喺中環買完六合彩，再喺上環買，呢個係乜嘢玩法呢？貝鈞奇話鍾意行路，每次買六合彩前都隨心行一小段路，途中見到有投注站就行入去買，仲話呢種「行大運」式嘅買飛方法，成功幫佢中過兩次二獎，加埋有成四百萬港元o架！
轉購電腦飛試運氣
貝鈞奇又透露，之前兩次中獎除咗事前「行個大運」外，買飛亦係自己揀心水冧巴，但今次佢喺兩間投注站都係買電腦飛，話想轉吓形式試試運氣咁話。除咗六合彩，佢亦好鍾意賽馬，仲自爆中過幾次3T，賭運相當唔錯。不過，佢就話鑑於自己係足總副主席，雖然本地波冇得賭，但係自己都堅持唔會去賭波喎。
卓妮