政情：何君堯罰款 要趙恩來「埋單」？
掛橫額係政界人士常用嘅宣傳手法之一，但顧慮到交通安全同市容，橫額唔係想點掛就點掛嘅，政府發現違規就會移除，仲要罰錢，好似立法會議員何君堯咁，佢今年二月喺荃灣有啲橫額違規，仲畀食環署捉到，但食環署做嘢似乎太過草率喇，竟然將違規通知書寄咗畀工黨社區幹事趙恩來，搞到趙恩來喺Facebook大鬧：「食環做事，求求其其！」
食環甩轆寄錯信
本來寄錯信都係小事一樁，趙恩來起初都冇放喺心上，真係激嬲佢嘅係食環署後嚟將違規罰款帳單寄畀佢，上款仲寫到明係趙恩來，要求佢繳交總額五百一十元四毫嘅罰款，質疑「何君堯違法，點解要工黨趙恩來埋單？」直斥係「荒天下之大謬」，仲話「如果唔交罰款，是否需要上庭抗辯？」佢仲話稍後會聯絡何君堯同食環署跟進事件添！食環署追數都追得咁烏龍，抵鬧喇！
