政情：戴耀廷播獨引爆泛民本土內亂
身兼港大法律系副教授嘅佔中發起人戴耀廷，早排喺台灣出席論壇時發表咗香港考慮「獨立建國」嘅言論，畀建制派狂轟。一向表明唔撐港獨嘅民主派就喺前晚搞聲援集會，同時本土派喺同一時間又喺附近搞集會。唔單止集會鬧雙胞，近年支持本土嘅大學學生會，又因為喺集會發言問題，同屬泛民嘅民間人權陣線（民陣）爆發爭議。今次戴耀廷嘅一番「建國」言論，竟然引起泛民同本土派之間嘅「內亂」添！
兩大學生會指被拒集會發言
其實近年本土派崛起後，唔少大學學生會都傾向支持本土，仲同親泛民嘅組織愈走愈遠添！繼退出學聯、杯葛由支聯會搞嘅六四晚會等等事件後，中大學生會會長區倬僖，同埋樹仁大學學生會外務副會長兼學聯常委張朗軒喺前晚就話，曾經透過學聯同民陣講過，話兩個學生會有意發言，對方仲話冇問題，但最終民陣只接受學聯代表發言，佢哋表示對事件感到遺憾同埋強烈譴責。
民陣澄清 冇用「唔容許」等字眼
民陣就深夜發聲明澄清，話喺集會前一日收到學聯署理常委會主席張倩盈嘅訊息，話想喺集會發言，但直至集會前都唔知由邊個發言，因此以為係學聯代表發言。佢哋仲話當晚中大同樹仁學生會話過想分開發言，但商討過後，合辦團體就覺得以學聯名義會較為接受，佢哋又話當時兩個學生會代表聽完之後，堅持要分開發言，仲自己走咗去，同埋話冇用「唔容許」呢類字眼回應學生會嘅訴求。
至於負責聯絡嘅張倩盈就喺Facebook解畫，話曾經向民陣提出要求，對方仲安排兩至三分鐘嘅發言時間，但係集會當晚就收到張朗軒電話，指民陣拒絕張朗軒同區倬僖發言。對於今次事件，張倩盈認為民陣唔夠靈活、自己安排亦都有不足，認為事件係行政誤會，唔希望被定性為民陣同學界嘅衝突。
之不過，本土派同泛民之間一向都有摩擦，喺氣氛稍為緩和少少之際，無啦啦因為戴耀廷嘅一句建國言論，又搞到軒然大波，破壞晒啲氣氛，咁又何必呢？
另外，教育局局長楊潤雄尋日出席一個場合時，被問及戴耀廷係咪適合繼續擔任教席，佢話唔應該由佢一個人去話係咪適合，而係由大學自行處理。