唔係講笑，本港樓價已經連升廿三個月，二月份又創新高嘞。最慘係港府高官動輒用美國加息做擋箭牌，翹埋雙手乜都唔做，任由樓市坐火箭飆升，房屋問題有乜法子唔成為港人最痛吖。
調查顯示，近半市民認為未來樓價只會繼續上升，但多達六成人認為家陣唔係入市良機。梗係啦，打工仔唔飲唔食十九年至買得起一個豆腐膶單位，連基本生活所需都變成遙不可及嘅奢侈品，想入市話咁易咩。所以呢，每逢房委會推出居屋都例牌爭崩頭，舊年嘅居屋項目甚至超額申請近五十倍，有人話中籤難過中六合彩，冇誇張o架。
呢嗱，新一輪居屋及「白居二」尋日接受申請，三個屋苑分別位於啟德、長沙灣及東涌，共提供四千幾個單位，連同「白居二」二千五百個配額，搶手就預咗嘞，尋日朝早樂富房委會客務中心都未開門啫，已經有廿幾人等候交表，排頭位嘅先生仲係前一晚已經排隊添，都咪話唔誇張。雖然愈早交表唔等於中籤機會愈大，但正如交表人士話齋，樓市係咁升，唔碰吓運氣申請資助房屋，擔心呢一世都唔使旨意上樓，唔心急就假咯。
話時話，交表人士之中不乏好爸爸好媽媽，講明中籤嘅話會幫子女出埋首期，希望子女有個安樂窩成家立室喎，真係可憐天下父母心咯。由此亦可反映，港府這些年推出嘅辣招花招完全係廢嘅，到頭來標本都治唔到，市民根本唔信政府有辦法壓抑樓市。難為高官們仲一味做騷，淨係運房局局長陳帆咋，一時下基層探劏房戶作哽咽狀，一時自比月老幫社企推組合屋，吹水唔抹嘴，硬係唔肯正正經經做實事增加土地及房屋供應。特首林鄭月娥都係一擔擔，講到社會要求推出租金管制及租金津貼就耍手擰頭，唔係話會變相補貼業主，就係話會令租盤減少，總之藉口多多。呢班廢官到底有冇誠意解決房屋問題，仲使問嘅。
講到呢度，功夫茶好想吟番首改編自《西北有高樓》嘅古詩，抒發吓無殼蝸牛嘅鬱結心情：「香江有高樓，何人獨自愁，問君何所憶，但見眼淚流。」冇計喇，今時今日嘅香港，公屋輪到死，私樓貴到死，居屋爭到死，上樓難過上青天，最慘係兩腳一伸都唔代表一了百了，事關陰宅隨時搶手過陽宅，唔一殼眼淚至奇吖。
點都好喇，資助房屋供不應求已經係不爭嘅事實，港產官僚與其搞埋啲乜嘢良心劏房、共享房屋，一味小打小鬧，不如增加居屋供應好過。有人咪將林鄭比作「女媧補天」嘅，補天就無謂嘞，補番個房屋缺口最實際。