政情：自薦入青委會 顏汶羽輸畀大學生
港府上周公布特首創新及策略發展顧問團名單，前日又公布青年發展委員會（青委會）名單，當中有唔少都係政商界二代。觀塘區議員、青年民建聯主席顏汶羽（Frankie）尋日就喺社交網站呻，做咗幾年青年工作，但自薦入青委會失敗，覺得失望兼失落。Frankie完美演繹何謂「一陣醋味傳入我的鼻」，輸畀十八歲科大生鄭康煥，係有些少唔甘心，但都唔需要太葡萄嘅。
自言從政多年有成績 大呻失望
Frankie上載自拍相，張相見佢揸住封信，原來嗰封信就係政府通知佢自薦入青委會失敗，佢話從政十一年嚟，集中做人力資源、教育、再培訓嘅政府研究同倡議，近三年做咗青年民建聯主席後，每年最少接觸三千人次嘅青年，接連失落加入青委會同人力資源規劃委員會，覺得有啲失望同失落。
不過，Frankie過幾日亦開始擔任滅罪委員會委員，佢話過往好少接觸保安範疇，嚟緊要補吓習先得，強調自己唔會忘記從政初心喎。