政情：小黃鴨咖啡館 林亮設「林伯信箱」解民憂
早兩日有外國研究報告指，浴室小黃鴨等泡水塑膠玩具入邊係細菌孳生嘅溫床，恐影響小朋友健康。尋日見到玩具界老行尊林亮，梗要跟進吓呢個話題，事關佢喺七十年前做出第一隻中國製造嘅塑膠小黃鴨，取代咗當時嘅日本製造，引領香港玩具業進入新時代。林亮話依家已經冇生產「沖涼鴨」，如果做都會確保產品安全衞生咁話。
盼延續獅子山精神
林亮九十幾歲人仍不言退，就係為咗推廣小黃鴨背後帶出嘅工業界奮鬥精神，現時生產嘅每一隻小黃鴨都係為咗做善事。最近佢籌備咗近兩年嘅首間小黃鴨咖啡館，喺灣仔一間書店內開幕，呢度唔止賣咖啡，店內仲有一個紅色「林伯信箱」，係林亮用嚟聆聽市民喺人生及事業上嘅難題，為大家排憂解困。
佢話希望藉此培養下一代有捱苦嘅毅力，令獅子山精神延續落去，佢仲會盡量親自回覆添！用呢種方式傾聽民情，認真貼地，唔知林亮個仔、身兼行政會議成員同立法會議員嘅林健鋒會唔會偷師呢？