政情：購物城 被寸象尾拍烏蠅黃定光三招救亡

阿廷喺會上發言時就話，北區水貨客情況嚴重，藥房林立，之前有藥房疑被縱火，唔少居民竟然話「燒得好，燒多幾間」，可見居民對水貨客影響生活係幾咁憤怒。佢認為香港應向海外多啲推廣旅遊，唔好靠內地一個單一市場，否則內地政策有變嘅話，對香港好大影響。

林卓廷遭斥「做騷」譁眾取寵

講講吓，阿廷無喇喇講起新田購物城，話購物城係完全失敗，連香港人都唔會去，象哥要用條象尾拍烏蠅至得喎。老實講，籌備近三年嘅元朗新田購物城今年二月試業，但只有約二十間商戶開張營業，遊客寥寥無幾，場面冷清。

聽到有人咁樣踩師傅，周浩鼎反指阿廷嘅言論係失實指控，話象哥主力推動嘅購物城已展開工作，力撐象哥花咗唔少心血。周浩鼎又話阿廷如有唔同觀點可提出客觀意見，而唔係借議會平台「做騷」，譁眾取寵，希望阿廷檢視吓自己嘅道德水平出咗乜嘢問題。對於有議員批評新田購物城，象哥就希望對方唔好冷嘲熱諷，要提出啲積極嘅建議咁話。

擬作內地團轉乘站 增客流量

象哥又透露，城規會三年前畀新田購物城嘅規劃許可今年九月到期，而佢已申請延期，城規會五月十八日就會處理佢哋嘅申請，業主亦已答應延期後會以一樣條件續租。依家約二百間商舖已有九十一間商戶已簽租約，有近三十間已開業，另有二十多間裝修緊。

象哥又推出救亡三招，包括租戶喺七月一日先起租；同內地旅行社及過境穿梭巴士公司商討，將購物城設為轉乘站以增加客流量，而購物城可提供旅遊巴到邊境作接駁；佢仲會游說香港旅行社以新田購物城作為景點。佢話好多嘢唔係咁簡單，「個仔生出嚟養大佢都好難」，但佢對購物城就好有信心。