中環出更：黃遠輝留房委會 政府鬧人才荒？
政府尋日公布委任香港房屋委員會（房委會）委員名單，除咗公布四名新委員外，現時身兼房委會資助房屋小組委員會主席嘅房委會委員黃遠輝，再度獲委任成為房委會委員，由於黃遠輝已經做咗六年委員，今次委任係打破不成文嘅「六六規定」，即係每人不能擔任超過六項公職，每項公職不能超過六年。
打破「六六規定」 續任兩年
黃遠輝接受查詢時話，政府當日同佢商討可唔可以繼續擔任房委會委員，因為房屋政策多轉變，挑戰亦多咗，佢當時亦同政府講，要視乎社會反應，擔心大家會覺得點解又係佢再續任，最終，政府都決定委任佢再做兩年。佢坦言，知道再獲委任與常規及以往做法唔同，對佢係鞭策，亦都係壓力，社會期望佢喺房屋可以做多啲嘢，希望大家可以畀多啲支持佢。
至於續任兩年後，會唔會就唔再做，佢話大原則上考慮，唔再續任係好事，現時難講兩年後係點，要視乎當時嘅情況，如果社會上有多啲有心有力嘅人士去擔任公職，加入新思維去參與係好事。
卓妮