中環出更：立會辦公室嘭嘭聲 議員「另類」度橋法
立法會開會時間好長，一眾議員開會前又要備課，唔係好易畀人笑「唔熟書」，所以佢哋多數都沒日沒夜咁喺立法會辦公室做嘢。卓妮早排喺立法會大樓內游走，喺部分辦公室門外聽到「嘭嘭」聲，到底班議員喺入面做咩呢？
喺立法會綜合大樓九樓，會計界梁繼昌（Kenneth）嘅辦公室內，原來收埋咗個詠春木人樁！Kenneth話細個嗰陣阿媽唔畀學功夫，但其實佢一直都好鍾意，所以大個咗就去學詠春。佢仲話自己師傅係一代宗師葉問徒弟一脈相承落嚟，每星期學一至兩次，咁放個木人樁喺辦公室，有時做嘢悶悶哋或諗唔通，就起身打幾下，等個人醒神啲。佢又戲稱，立法會咁多肢體衝突，要學嚟保護吓自己喎。
鄺俊宇「一枱兩用」 其他人唔知
再喺同一層行前啲，民主黨議員嘅辦公室內，又聽到「乒乒嘭嘭」嘅聲，原來係鄺俊宇（Roy）喺度打乒乓波。阿Roy話辦公室地方淺窄，最初係想買一張多功能嘅枱，買完先發現張枱夠大、夠平穩，先試吓用嚟打波，但就唔多夠彈力。佢又話依家有時諗唔通啲政策，都會一邊打一邊思考，好似之前空置校舍議題都係咁度出嚟，但係其他人唔知張枱可以咁用，喺外面聽到會覺得好神奇。
再走落幾層喺六樓嘅民建聯議員辦公室，聽到一班議員助理好高興咁圍埋喺張國鈞（Horace）間房入面。到底咩事？Horace笑稱，買咗個飛鏢靶番嚟先知好多同事鍾意玩，點知佢就飛鏢射靶，班同事就瞄住隔籬Horace張相嚟玩，所以大家就起哄。佢仲話呢排新接觸呢項運動，有時做嘢攰就可以輕鬆吓。原來議員辦公室都收埋唔少玩意，不過日日開咁多會，真係好攰又壓力大嘅，間中起身輕鬆吓，先可以帶頭做到職業安全健康嘛！
卓妮