林鄭月娥豪擲三萬元捐款予民主黨，這三萬大洋有如三千枚深水炸彈激起千重浪，效果之震撼，老朽相信以林鄭的「膽自大」也必窒一窒，原來捐錢「行善」也不是個個懂的，今趟林鄭的「We Connect」引發之圍剿討伐在網上可說鋪天蓋地而來！以買一呎樓價的價錢去買「大和解」，或許是太傻太天真，之不過卻惹來如唐朝駱賓王《為徐敬業討武曌檄》的回響！
武則天以女子稱帝，管治唐朝亦有政績，故自以為如「日月臨空」，乃造字「曌」為其個人專屬之名；林鄭之「執行能力」同武則天比，點睇都係冇得揮，起碼武則天善用人才，林鄭則善用廢柴，愛玩放生做功德。《為徐敬業討武曌檄》力數武則天如何「近狎邪僻，殘害忠良」、「人神之所同嫉，天地之所不容」，以至發出「請看今日之域中，竟是誰家之天下」的大哉問！證諸林鄭，敵我不分，虧佢做咗三十幾年高官，家陣更貴為特首，竟連公務員的「政治中立」也拋諸腦後，怎不惹來「瓜田李下，從此糾纏不清」之詰問？
正如有論者指出，高官出席政黨黨慶屬酬酢，係畀面，但捐錢就係認同，係支持，含意深遠。連身兼行會成員嘅新民黨主席葉劉淑儀都話林鄭此舉「好危險」。唉，都話權力是強烈的催情劑，意亂情迷下，原來真係會出事，捐款原來真係唔係個個識㗎！林鄭化身觀世音，灑下三萬大洋支持反中亂港、不時高喊「結束一黨專政」嘅白鴿黨，呢下真正嚇死寶寶了！究竟佢係乜心態下去「大和解」？難怪建制派打翻醋埕：白鴿黨值三萬，咁我哋又值幾多呢？
林鄭敵我不分，三萬大洋激起千重浪，好戲仍在後頭。可惜建制派中多是「哀其不幸，怒其不爭」之輩，任你敲鑼打鼓，肯定找不到半個駱賓王，否則來篇《為三萬大洋討膽自大檄》，未嘗不是一宗美事。