政情：八網難逃：香港陳玉娥Vs馬國陳玉娥 你撐邊個？
立法會補選結果已塵埃落定，新界東參選人陳玉娥以一千五百零四票低票落敗，連保證金都攞唔番，但若喺平衡時空下，另一位「娥姐」參選，唔知結果又會點呢？日前有學者網上貼圖，指馬來西亞同樣有一位外貌相當吸睛嘅「陳玉娥」，更當選成為馬來西亞華裔小姐冠軍，學者更稱佢為「真陳玉娥」。有網民力撐若馬國「娥姐」參選下屆立會選舉，「下次選舉一定投陳玉娥！」
同樣「選舉」出身
國際關係學者沈旭輝日前喺Facebook貼圖「堅離地城：沈旭暉國際生活台」，指馬來西亞近來有一位炙手可熱嘅「陳玉娥」。從照片可見，呢位馬國「娥姐」外表甜美、皮膚白皙、身材火辣，穿上低胸晚裝，迷倒唔少網民。雖然兩位「娥姐」同樣留長髮，但風格各異，更同樣係「選舉」出身，但馬國「娥姐」並非參選立法會，而係參與選美比賽，更憑美貌奪得馬來西亞華裔小姐冠軍，實力可見一斑。
馬來西亞陳玉娥來自柔佛，今年只有二十二歲，其Instagram有四十萬追隨者，喺參選前已經係網絡紅人，而香港陳玉娥則五十八歲。
唔少網民都大讚馬國「娥姐」吸引，「馬來西亞第二個家計劃啲申請表，喺邊度攞？」、「佢無政綱都應該選得入」。亦有人搞笑咁話，「你拎陳玉娥嚟同陳玉娥比，我覺得陳玉娥係比較優勝」。