政情：林健鋒指野豬傷人 被斥唔尊重生物
商界議員林健鋒日前喺立法會就野豬問題提出口頭質詢，話近來唔少野豬覓食時走入民居，影響市民，仲話環境局局長黃錦星成日行山，驚啲野豬會撞佢落山，希望政府關注野豬問題。但有保育團體就林健鋒嘅言論進行大反擊，批評佢係對野豬呢種「非我異類」有排斥、滅絕嘅思維，唔尊重其他生物，擔心佢嘅言論會挑起部分人嘅「殺念」，重提殺豬惡行咁話。
野豬保育團體「香港野豬關注組」尋日逐點反駁林健鋒嘅言論，話野豬都係香港一分子。對於林健鋒話野豬翻倒垃圾桶，破壞環境衞生，又會撞傷、咬傷途人，以及影響道路安全，關注組話野豬翻倒垃圾桶係食環署冇固定同鎖好垃圾桶，指林健鋒唔應該將啲責任推晒落野豬度。
極度驚恐始作出本能反應
至於有指野豬傷人，關注組就話野豬只會喺極度驚恐情況下先會作出本能反應。而車輛「撞貓撞人撞牛撞狗撞豬」情況日日出現，所以係應該嚴懲超速同大意嘅駕駛者咁話。關注組鬧爆林健鋒嘅講法係不負責任。
林健鋒日前講到跟進野豬問題都係想香港太平，但依家就引起保育團體向佢開戰。睇嚟佢如果真係關心野豬問題，都要同關注團體傾吓先得喇！