政情：吳永嘉寸官員似錄音機 AI都可取代

吳永嘉喺發言時話再工業化涉及唔同範疇，需政府跨部門協調同喺制度上創新。香港雖有完善制度政策，但跟唔上形勢發展，例如屋宇署曾要求網購平台經營者喺由機械人工作嘅貨倉建十格廁所，就係法例跟唔上現實，而業界苦口婆心一直爭取的放寬《稅務條例》第39E條 ，政府都未有回應，財政司司長陳茂波喺新一份財政預算案亦冇提及。

倡政府跳出框框 思考再工業化

佢又話現時AI發展千里，唔少行業工種可被AI取代，媒體亦不時公布未來十年可被取代嘅工種，揶揄「如果做官員都似人肉機器咁講標準答案，AI機械人都可以取而代之。」佢希望政府可以跳出框框，思考點樣令香港再工業化。

就議案提出修訂嘅勞工界議員何啟明就話，其所屬嘅工聯會一直支持以人為本、就業為本嘅經濟發展，但香港製造業被抽空，政府雖講再工業化，但講嘅係雲端、伺服器，令人失望，質疑政府點解唔可以考慮再發展傳統製造業。佢又舉例，指德國亦有唔少傳統製造業升級轉型，香港亦可以讓傳統製造業結合本地設計行業發展。

莫乃光批冇藍圖助各行業轉型

資訊科技界議員莫乃光就批評，政府只懂推出一刀切嘅科技券同資助申請等措施，但並冇協助各行業轉型，為各行業轉型制訂藍圖，喺針對企業同人才培訓方面都冇與時並進，認為政府應協助唔同產業制訂發展藍圖。

畀班議員狂插，楊偉雄喺答辯時話今次唔同黨派都對再工業化嘅睇法一致，有利推動再工業化發展，而要令香港由去工業化轉為再工業化，需要有基礎設施，創造有利研發環境，提供知識產權嘅保障，培育人才，提升勞動人口生產力，政府鼓勵大學進行研發，亦會投入資源培養年輕人投入創科產業，提升年輕人潛能。又喺度播帶講標準答案，好似人肉錄音機咁，楊偉雄真係鬧極都唔醒。