中環出更：教書似官職延續 陳家強自爆變「激」
財經事務及庫務局前局長陳家強舊年離開政府之後，重返「娘家」香港科技大學做財務學系兼任教授，尋日喺科大工商管理學院舉行嘅一個午宴上見到佢，佢就笑稱依家教書主要聚焦喺金融科技監管，咁啱呢個範疇都係財庫局管轄，所以佢覺得現時呢份教職就好似係以前做官時嘅延續，仲自爆上堂時言論都好「激」喎。
話金融科技唔一定好
為乜咁激？唔通佢都批評政府歎慢板？原來唔係，佢講緊嘅係唔好一聽到金融科技，就以為一定係好嘅，所以佢主張要監管ICO加密貨幣等等，否則業界及市民就會面臨潛在風險。
科大商學院院長譚嘉因都喺度，陳家強當年就係喺院長任內加入政府，前院長鄭漢國就去咗嶺大做校長。照咁講，佢嘅前途咪睇高一線？佢就笑笑口話諗都唔敢諗喎。
卓妮