中環出更：指讀好書搵好工屬誤導 馬浩文：興趣為上
唔少家長都會教自己嘅仔女「畀心機讀好書，將來搵份好工」，但係隨着大學生數量愈嚟愈多，好多畢業生都話搵唔到理想工作，呢個諗法仲係咪正確呢？香港義工聯盟（聯盟）日前舉辦春茗，提到會開展一啲幫助時下年輕人嘅工作，例如搞啲儲錢計劃、協助學生揀科咁，其中該會董事會常務副主席馬浩文話「讀好書搵好工」呢個諗法係由始至終都係誤導，認為搵工最重要都係興趣，如果對份工冇興趣，其實都只係會做得唔開心。
馬浩文仲話以前做過研究，睇吓有冇邊啲工種係對學歷要求較低，但收入係可觀嘅，當中包括建築、紮鐵同機電維修等，其中行船都可以月入四萬至五萬元，有番若干年資之後可投身海事處或者一啲物流運輸嘅公司，當中唔少都可以月入十萬元以上。至於辛唔辛苦，佢話紮鐵最辛苦，以前試過推介一個單車運動員去紮鐵，諗住運動員嘅體格都唔會太差，點知做咗半年都係頂唔順！睇嚟就算學歷要求唔高，都唔係咁容易做得到嘅。
彭芷君指工作無十全十美
另一位常務副主席蔡榮星都話時下年輕人唔捱得，又要要求五天工作，又想人工高，認真難管理。事關佢係造鞋嘅，入行嘅年輕人唔多，但香港年輕一輩流動率高，好多時做一兩年就辭工，年輕人都學唔到嘢，公司亦要重新請人、培訓新人，對勞資雙方都唔好。
轉頭見到聯盟主席譚錦球、副主席劉娟、副秘書長彭芷君同理事張芯瑜喺度傾吓開展乜嘢新計劃。對於年輕人每份工都只係做一段短時間，彭芷君認為係一個大問題，一來無法累積經驗，長遠或令社會上缺乏有足夠經驗嘅人才，影響社會長遠發展。佢仲話有啲年輕人有「錯覺」，以為會有十全十美嘅工作，但現實就係每份工都有「唔順超」嘅地方，可能要加強番啲年輕人處理唔順心情況嘅教育先得喇！
卓妮