政情：有相為證：坐建制派座位 陳淑莊想「叛變」？

立法會尋日就「一地兩檢」召開公聽會，屬於泛民嘅陳淑莊（Tanya）入咗會議室之後，就直接行去屬於建制派民建聯（民記）嘅一排座位，最後坐咗喺民記主席李慧琼嘅位置，被陳克勤、何俊賢、周浩鼎同陳振英等建制派議員包圍。陳克勤同何俊賢立刻「圍攻」Tanya，問佢「係咪想加入（民記）」、「想坐主席位呀？」搞到Tanya鬼咁尷尬。其實Tanya「深入」建制陣營，係因為民主派原本嘅座位讓咗畀出席嘅公眾人士，所以議員集中坐喺原本屬於建制派嘅位；加上尋日無指定座位，所以先出現Tanya埋建制派堆嘅畫面。後來一眾民主派盟友梁耀忠、許智峯等人見狀即前去解圍，坐喺Tanya隔籬，先至令呢個「叛變」畫面冇咁突出。