政情：姚松炎 陳家珮拉票當老奉 辣(興)樁腳

搵完人幫手拍片 姚唔吼

姚松炎被寄予厚望出戰九龍西，點知地區工作做唔足，又少同地區人士溝通，加上只迷信「朱凱廸式」拉票，搞到最終落敗收場。雖然選舉後佢已經話會承擔所有責任，但有泛民中人就埋怨，選舉時叫人幫手拍片做宣傳，又搵嚟九龍西地區人士幫忙出面，誰不知最後都無出過，激氣到話「早知唔幫佢拍喇！」又有泛民中人話，幫姚松炎做咗一批宣傳品，最後都係無用到，但佢自己就用埋啲似係被人惡搞嘅醜樣橫額，真係畀佢激死！

陳拜票懶去 妄想要戶口簿

同樣高票落敗嘅陳家珮亦唔好得幾多，輸咗仲要被地區人士唾棄，直言「唔係畀面葉太（葉劉淑儀）都唔會幫佢呀！」選舉前已有地區聲音不滿陳家珮無去拜票「打招呼」，當時陳家珮仲死撐話要等埋葉劉，殊不知選舉後，除咗地區人士外，更有社團組織成員都話選前無見過陳家珮去拜票。仲有地區人士因為畀面葉劉落力拉票，令陳家珮喺部分票站領先對手區諾軒數百票，點知選舉後只收過葉劉講多謝，陳家珮就影都唔見，佢非常氣憤話「下次陳家珮再出嚟都唔會幫！」

不單止禮數欠奉，有建制派人士更爆出，陳家珮所屬嘅新民黨，竟然有人老實不客氣開聲問地區人士攞「戶口簿」（支持者聯絡方法）去拉票，唔識佢嘅，真係以為佢新嚟，「戶口簿」如身家財產，可以立亂畀嘅咩？加上佢安排宣傳品又「立立亂」，真係唔知點樣幫。又有人話，日日返港島工作，整個選舉期都未見過陳家珮，反而見過區諾軒，直言輸都係有理由喎。