中環出更：英歌舞跳出世界紀錄 彭少衍險甩轆
為咗推廣傳統文化，六百位身穿傳統戲服嘅表演者，尋日喺元朗東頭工業區一齊跳英歌舞。雖則活動順利創造世界紀錄，但原來戲服問題差啲令挑戰紀錄嘅計劃泡湯。策劃活動嘅香港潮僑英歌總會主席彭少衍話，原來預算有八百人一齊跳，但內地廠商因為農曆新年放假而無法生產足夠嘅戲服，好彩減少數量之後仍然夠數打破紀錄咁話。
彭少衍話籌辦今次活動之前已打聽過，創造集體跳英歌舞世界紀錄嘅條件，要有超過五百二十位受過相關訓練不少於四十八小時嘅表演者共同參與。佢係本港唯一一隊英歌隊嘅負責人，自知隊員不足百人，必須要搵援兵，於是就向元朗區內嘅學校招手，結果得到幾百人熱烈響應。
訂造戲服 撞正內地長假
點知向內地廠落柯打訂造戲服，遇上內地長假期。彭少衍話，要廠商於短時間內生產大量戲服不可行，只好減少表演人數，今次活動嘅參與人數無先前預計咁多，但都仲係符合創造世界紀錄嘅要求，希望透過今次活動喚起市民大眾對英歌舞嘅興趣。英歌舞嘅表演內容係圍繞梁山泊一百零八位好漢嘅故事，主要角色包括有武松、李逵同魯智深等水滸傳人物。
立法會議員陳恒鑌都表演過英歌舞，至今仍回味聞鼓聲而起、隨節拍而舞，並從中領略中華藝術文化嘅英歌舞活動。佢話自初中參與英歌舞開始，一直都係擔當小兵嘅角色，直至廿多歲佢轉做女朋友嘅「兵」之後，就告別英歌舞喇！
卓妮