中環出更：波哥教路 游自由式治腰痛
立法會財務委員會主席陳健波（波哥）一向有血壓高問題，但其實佢嘅腰骨都曾經受傷，向來注重養生嘅佢就教路要勤游水去解決腰痛問題，仲一定要游自由式，咪游蛙式添！
開會冇腰枕實「瓜得」
波哥講起幾年前搭飛機拎行李時受傷，佢曾經搵骨醫治療，但醫生竟然叫佢同痛苦一齊生活喎。之後佢聽人講日日游水有幫助，結果佢游足一個月之後就真係冇再痛喇。雖然解決咗腰痛，但係佢都要繼續護腰，仲喺立法會自備腰枕，笑言若果冇咗腰枕，佢一定「瓜得」喎。
近年財會成為拉布重災區，波哥要主持會議，郁親都要坐好幾個鐘頭，真係難為咗佢。好多議員開會開得太耐，都有去唔到廁所嘅困擾，波哥就講笑話自己「功力」愈嚟愈好，因為主持會議時可以好耐先至去一次廁所，有時仲可以等到會議完結先去囉！
卓妮