政情：胡珠話後生仔係奢侈品 「邊度敢請」
飲食業人手短缺，愈嚟愈難請人，好多業內人士都大嘆點加人工都請唔到人。本身做酒樓嘅國際餐飲聯會總會創會會長胡珠，講起早前嘅團年飯，酒樓嘅生意多咗逾一成，但依家請人好難，形容後生仔係「奢侈品，邊度仲敢請呀」。
佢話依家夜晚擺圍酒，都因為人工、成本都增加，需要加價，餐飲業工時長，後生仔又好多活動，寧願搵少啲都唔做，簡直冇後生仔入行，令到飲食業畸形發展，喺酒樓工作嘅，個個都好大年紀，但依家連七十歲嘅阿伯都好難請，佢哋都寧願做保安等較舒服嘅工作，人手短缺下，睇住香港餐飲水準下降，最希望本港可以增加輸入外勞。