政情：黃國健呼應男女平等 倡設男士節
尋日係國際婦女節，坊間唔少團體都搞活動慶祝，而立法會議員黃國健（KK）尋日出席慶祝婦女節活動嘅時候竟提倡另設男士節，更直言要男女平等，唔通佢不滿婦女節而公然柴台？
KK所屬嘅工聯會尋日舉行慶祝婦女節聯歡晚會，但佢並冇柴台，反而當住勞工及福利局局長羅致光面前，要求政府透過加強託兒服務等方法，以釋放女性勞動力，從而避免輸入外勞，的確係把握機會為女性同打工仔發聲o架！不過，佢又認為男女平等而應設男士節，成功博得在場男士歡呼。
自爆喺家中地位唔高
邊月邊日係男士節？KK坦言暫時未有頭緒，因為只為希望男女平等，亦同男士喺家中地位有關，但喺呢個時候佢就苦笑，冇繼續講落去，似乎有口難言咁喎。佢最後就透露，喺家中嘅地位其實唔高，只係麻麻，又話普遍香港家庭嘅一家之主都係由女性去擔當喎。未知各位男性有冇同感呢？