政情：張超雄千Q狂發燒公帑嘥時間

立法會秘書處前日凌晨截止收取議員就預算案提出嘅書面問題。據了解，今年秘書處一共收到六千四百零三條書面提問，較舊年嘅七千三百二十一條，減少九百一十八條，下跌約百分之十三。不過，現屆立法會有六人被取消議員資格，實際議員人數只有六十四人，扣除大會主席不是財委會委員，共有六十三名議員提出書面問題，即每人平均提出約一百零一條問題。財委會將於下月十六至廿日，舉行廿一節特別會議，審核二○一八/一九年度開支預算，而政府承諾優先處理首三千三百條問題，並會喺有關環節舉行前一天提供書面答覆。

根據初步統計，今年嘅「問題議員」首五名，分別為連任「問題王」嘅張超雄，提出一千條問題，其次係社福界邵家臻，提出三百七十九條、第三位至五位都係由公民黨（公文袋）議員包攬，順序為郭家麒提出三百三十四條、譚文豪提出三百廿一條及陳淑莊提出二百六十八條。睇真啲張超雄同邵家臻雖然只差一位，但佢哋嘅提問數目就可以相差成六百廿一條，到底係張超雄整合能力低，抑或真係有咁多嘢要去「關心」呢？

社署最受關注 收698條問題

至於備受關注首五個政府部門，分別係有六百九十八條嘅社署，其次係教育局，有四百七十七條、第三位係食物及衞生局（衞生科），有三百二十五條、第四及第五位就係商經局（工商及旅遊科）同發展局（規劃地政科），分別有二百二十六條同二百一十條提問。

相信張超雄同邵家臻都「貢獻」唔少，先會令社署成為箭靶，睇怕社署署長葉文娟都要墊高枕頭諗吓點去回應喇！