中環出更：EQ陳肇始入熱廚房包餃唔掂
趁住尋日三八婦女節，立法會議員葛珮帆（EQ）帶埋班年輕嘅區議員同社區幹事，仲約埋食物及衞生局局長陳肇始一齊入廚房煮番兩味，齊齊炮製「玉米紅蘿蔔蝴蝶餃」同「紫薯玫瑰杯子蛋糕」，但佢哋似乎都太少入廚房喇，整起上嚟似乎有啲雞手鴨腳，賣相差咁啲喎。
做過護士嘅陳肇始包傷口就包得多喇，唔知包餃子又掂唔掂呢？睇落佢就唔太在行，佢都話唔記得上一次入廚房係幾時，但就記得以前喺英國讀書嗰陣，試過整馬豆糕，但原來馬豆糕一啲都唔容易整，佢反覆練習多次之後，終於有一次睇落好靚好完美，點知一食先發現唔記得落糖，所以都係失敗收場。
EQ趁婦女節提10訴求
EQ都笑自己嘅製成品醜樣，話自己都有啲包普通餃子嘅經驗，但蝴蝶餃就係第一次整，仲話大廚叫佢好似「數銀紙」咁搣靚隻餃子，但其實佢都唔明「數銀紙」嘅意思，令佢不禁慨嘆家庭主婦唔容易做，所以趁住婦女節向局長提咗十個訴求，包括免費接種子宮頸癌疫苗、延長產假同侍產假、免費乳癌普查等，實行為婦女爭取多啲權益咁話。
觀塘區議員顏汶羽、東區區議員林心廉、沙田區議員董健莉都有落場，其中顏汶羽好多工具都唔識用，以為佢都係好少入廚房，一問之下原來佢係經常煮嘢食o架！佢話佢呢行好多時都會一個人食飯，所以如果喺屋企嘅話都會煮番兩味家常小菜，而且以蔬菜為主，因為成日出去應酬都食得好肥膩，所以喺屋企就會煮得清淡啲健康啲。咁點解今次都係煮得咁狼狽？佢就話未整過甜品，所以咪好似乜都唔識咁囉！
卓妮