工會斥管理層「外行人」內訌加劇
【本報訊】九巴經歷兩年多的「大換血」，管理層面目全非，與前線員工的關係更見惡劣。九巴職員工會主席李國華痛斥九巴現時的高層均是「外行人」，質疑工程師、警員出身的管理層，「點樣可以管理咁大嘅運輸團隊呢」，炮轟「而家啲管理層係退步定無腦？」九巴僱員工會主席郭志誠亦批評九巴「睇唔起勞工處、員工」，多年來拒絕與建制派以外的工會接觸。
總工程師任車務總監
李國華昨在電台節目中狂數現時多名九巴高層缺乏管理巴士業務經驗，「（車務總監）梁健宏本身係工程部總工程師、（企業策劃及業務發展總經理）蘇偉基就睇住盤數、（車廠總經理）彭樹雄本身當差嘅。有經驗嘅管理層因退休、被解僱已走得七七八八，突然之間咁大個運輸團隊，呢啲人點管理呢？」
他又質疑「彭樹雄先生唔通將我哋班巴士佬當警隊咁管呀？唔使日日操體能呀！我揸巴士咋，唔係紀律部隊，點樣用佢哋嘅模式管理呢？（彭）上任幾個月，已經出咗咁多事，佢點管理？」
九巴高層與前線員工不咬弦，在今次工潮中，工會之間的內訌亦加劇，與李出席同一場合的郭志誠認為工聯會屬下的汽車交通運輸業總工會九巴分會號稱是九巴最大的工會，但一直未就四名車長被解僱一事發聲，質疑該會「唔係企喺工人嗰一邊」。他認為汽總無論支持公司或作為調停者，均應交代立場。李國華又揚言九巴若繼續解僱其他曾參與罷駛的車長，不排除發動工業行動。