一個社會政治風氣日益惡質化，除了司法不公、法治不彰，很大程度也因為官員的傲慢。舊社會的官講求「官德」，而今之為官，謙稱自己是「公僕」，高舉「廉潔奉公、為民服務」大旗，但實情往往有很大的落差。
話說東方報業集團上月二十五日致函律政司提出八條提問，司長拖咗幾日至回覆，然而通篇禪語，睇到人如墮五里霧中，答即是問，問即是答，玄之又玄，完全冇實際回應何時檢控漢奸黎或採取任何行動，東方自然唔收貨，於是追加七條問題，其中第七條問：愛國愛港團體屢被針對，反中亂港人士卻有「司法保護傘」被放生，律政司檢控時是否有政治傾向？這個問題老朽亦好想知道答案，皆因涉及「法律面前，人人平等」呢個法治嘅核心價值問題，關乎香港能否長治久安，律政司好應該加以解釋以安吾人之心。
好喇！呢趟律政司反應果然夠快，隔日就有回音，可惜今次連禪語都懶得玩，直指「就你（東方）的查詢，我們（律政司）已於三月一日作出回覆，我們沒有進一步補充」。本報「功夫茶」認為「冇補充」即係「唔做嘢」，漢奸黎有司法保護傘罩住，仲唔打橫行咩！
而老朽就覺得律政司司長鄭若驊十分傲慢，東方嚴肅的追問七條問題，條條都切實有point，你竟然大打官腔，敷衍塞責，這是林鄭月娥所說的「一起同行、擁抱希望、分享快樂」嗎？「一起同行」咁鬼晦氣，「冇嘢補充」係律政司司長應有的態度嗎？難怪連中學生都揶揄「僭建驊」：「僭建僭到何時了，法律知多少」。
人是平等的，但專業是分等級的。貴為律政司司長，答覆正義傳媒嚴肅的問題，不是要令人「看得到，抓得起」嗎？家陣反而語帶高傲晦氣，處處顯出高高在上的藍血特質，試問如何「一起同行」？