政情：岑智明天文台遇上「徐志摩」
講起近代詩人徐志摩，相信唔少人都會諗起佢嘅詩作《再別康橋》，「輕輕的我走了， 正如我輕輕的來」，就係講徐志摩最後一次離開英國劍橋返中國嘅時候。點解講起佢？因為天文台台長岑智明尋日喺社交網站Facebook發貼，同一位好似徐志摩嘅男子自拍，仲反問大家「唔通徐志摩以前真係嚟過天文台？」
原來係馬浚偉
睇真啲！原來係藝人馬浚偉同岑智明合照，馬浚偉將會喺一套舞台劇內飾演徐志摩，所以岑智明就搞笑問徐志摩係咪去過天文台。而唔少網民都留言關心馬浚偉病好未，擔心佢傳染工作人員之餘又傷身，岑智明就話「戲唔係今日拍嘅」，係上個月嘅事，不過拍乜嘢就大賣關子喇！
其實，之前佢哋兩個都有見過吓面，有網民戲謔，叫台長踢馬浚偉入天文台之友，又話可以請馬浚偉做新天氣先生，岑智明就笑言咁就要重金禮聘嘞！